ചാവറ കുര്യാക്കോസ് അച്ചന്റെ വിശുദ്ധ പദവി: മൂന്നാം വാർഷിക ആഘോഷം ഇന്ന്

മാന്നാനം : ചാവറ  കുര്യാക്കോസ് ഏലിയാസച്ചന്റെ വിശുദ്ധപദവി പ്രഖ്യാപനത്തിന്റെ മൂന്നാം വാർഷിക ആഘോഷം ഇന്ന്. തിരുവനന്തപുരം സെയ്ന്റ്  ജോസഫ് പ്രൊവിൻസിന്റെ കീഴിലുള്ള വിദ്യാഭ്യാസ സ്ഥാപനങ്ങളിലെ കുട്ടികൾ ചടങ്ങുകളിൽ പങ്കെടുക്കും.

കെ ഇ സ്കൂൾ അങ്കണത്തിൽ നിന്ന് രാവിലെ 10ന് പുറപ്പെടുന്ന ഭക്തിനിർഭരമായ പദയാത്ര 11ന് മാന്നാനം പള്ളിയിൽ എത്തിച്ചേരും. തുടർന്ന് സിഎംഐ പ്രിയോർ ജനറൽ റവ. ഡോ. പോൾ അച്ചാണ്ടിയുടെ കാർമികത്വത്തിൽ കുർബാനയും നൊവേനയും നടത്തും.

തിരുക്കർമങ്ങൾക്ക് തിരുവനന്തപുരം സെയ്ന്റ്  ജോസഫ് പ്രവിശ്യാധിപൻ ഫാ. സെബാസ്റ്റ്യൻ ചാമത്തറ, മാന്നാനം സെന്റ് ജോസഫ് ആശ്രമാധിപൻ ഫാ. സ്കറിയ എതിരേറ്റ് തുടങ്ങിയവർ നേതൃത്വം നൽകും. വിവിധ സ്കൂളുകളിൽ നിന്നുള്ള കുട്ടികൾ റാലിയിൽ പങ്കെടുക്കുമെന്ന് കോർപറേറ്റ് മാനേജർ ഫാ. ജയിംസ് മുല്ലശേരി അറിയിച്ചു