മണിക്കൂറുകളുടെ വ്യത്യാസത്തില്‍ വൈദികരുടെ വിയോഗം; കണ്ണീരോടെ നെയ്യാറ്റിന്‍കര രൂപത

അനിൽ ജോസഫ്

നെയ്യാറ്റിന്‍കര: മണിക്കൂറുകളുടെ വ്യത്യാസത്തില്‍ നെയ്യാറ്റിന്‍കര രൂപതയിലെ രണ്ട് വൈദികരുടെ വിയോഗം നെയ്യാറ്റിന്‍കര രൂപതയെ അക്ഷരാര്‍ത്ഥത്തില്‍ ദുഖത്തിലാഴ്ത്തി. മരിയാപുരം കര്‍മ്മല മാതാ ദേവാലയത്തിലെ വികാരിയായ പളേളാട്ട്യന്‍ സഭാംഗം ബനഡിക്ട് കണ്ണടനും, കീഴാറൂര്‍ വിശുദ്ധ പത്രോസ് ദേവാലയ വികാരി ഫാ.ഡി.ആന്‍റണിയുമാണ് മണിക്കൂറുകളുടെ വ്യത്യാസത്തില്‍ മരണമടഞ്ഞത്.

ഇന്നലെ വൈകിട്ട് 6 മണിക്ക് ഹൃദയാഘാതം മൂലമാണ് ഫാ.ബെനഡിക്ട് കണ്ണാടന്‍ മരണമടഞ്ഞത്. അസുഖബാധിതനായിരുന്ന ഫാ.ഡി.ആന്‍റണിയുടെ വിയോഗം 8.30 നായിരുന്നു.

നെയ്യാറ്റിന്‍കര രൂപതയിലെ പുരാതന ദേവാലയമായ മരിയാപുരം പളളി പൊളിച്ച്, 6 മാസം മുമ്പാണ് പുതുക്കി പണിതത്. കൂടാതെ ചത്തിസ്ഗഡില്‍ സേവനത്തിലായിരിക്കുമ്പോള്‍ ഗോത്രവര്‍ഗ്ഗക്കാരുടെ ആകുലതകളിലും സങ്കടങ്ങളിലും ഫാ.ബെനഡിക്ട് ഇടപെടുകയും ആശ്വാസം പകരുകയും ചെയ്തിരുന്നു.10 വര്‍ഷമായി സേവനമനുഷ്ടിക്കുകയും, താന്‍ തന്നെ പണിയുകയും ചെയ്ത മരിയാപുരം ദേവാലയത്തില്‍ ഭൗതീകദേഹം എത്തിച്ചപ്പോള്‍ ഇടവക വിശ്വാസികളുടെ ദുഖം അണപൊട്ടി.

തിരുവനന്തപുരം, നെയ്യാറ്റിന്‍കര രൂപതകളില്‍ സേവനം ചെയ്താണ് ഫാ.ഡി.ആന്‍റണി യാത്രയായത്.

വൈദികരുടെ വിയോഗത്തില്‍ നെയ്യാറ്റിന്‍കര രൂപതാ ബിഷപ് ഡോ.വിന്‍സെന്‍റ് സാമുവല്‍, മോണ്‍.ജി.ക്രിസ്തുദാസ് കേരളാ ലാറ്റിന്‍കാത്തലിക് അസോസിയേഷന്‍, കെ.എൽ.സി.ഡബ്ള്യൂ.എ., രൂപതാ പാസ്റ്ററൽ കൗൺസിൽ, എല്‍.സി.വൈ.എം. തുടങ്ങിയ സംഘടനകളും അനുശോചനം രേഖപ്പെടുത്തി.

നാളെ രാവിലെ 10-ന് ശ്രീകാര്യം മണ്‍വിള പളേളാട്ട്യന്‍ ആശ്രമത്തിലാണ് ഫാ.ബെനഡിക്ടിന്‍റെ മൃതസംസ്കാര ചടങ്ങുകള്‍.

വൈകിട്ട് 3.30-ന് നെടുമങ്ങാട് മാണിക്യപുരം കൊച്ചുത്രേസ്യാ ദേവാലയത്തില്‍ ഫാ.ഡി.ആന്‍റണിയുടെ സംസ്കാര ചടങ്ങുകള്‍ നടക്കും.