ഭാരതീയ ക്രൈസ്തവ സംഗമത്തിന്റെ രൂപീകരണം കേരളത്തിലെ കത്തോലിക്കാ സഭയുടെ അറിവോടെയല്ല; കേരള റീജൺ ലാറ്റിൻ കാത്തലിക് കൗൺസിലിൽ

ജോസ് മാർട്ടിൻ

ആലുവ: ഭാരതീയ ക്രൈസ്തവ സംഗമത്തിന്റെ രൂപീകരണത്തിൽ കേരളത്തിലെ കത്തോലിക്ക സഭയ്ക്ക് അറിവില്ലെന്ന് കേരളത്തിലെ ലത്തീൻ സഭാ വക്താവും കെ.ആർ.എൽ.സി.സി. വൈസ് പ്രസിഡന്റുമായ ജോസഫ് ജൂഡ് അറിയിച്ചു.

ഇത്തരം ഒരു നടപടിയെക്കുറിച്ച് സഭയുടെ ഒരു ഔദ്യോഗിക വേദിയിലും ഇതുവരെ ചർച്ച ചെയ്തിട്ടില്ലെന്നും, രാഷ്ട്രീയ പാർട്ടികൾ രൂപപ്പെടുത്താൻ പൗരന്മാർക്കുള്ള അവകാശം വിലമതിക്കുമ്പോൾ തന്നെ അത് കത്തോലിക്ക സഭയുടെ നീക്കമായി ചിത്രീകരിക്കാൻ ചില മാധ്യമങ്ങൾ നടത്തുന്ന ശ്രമം അപലനീയമാണെന്നും അദ്ദേഹം വ്യക്തമാക്കി.

കേരള രാഷ്ട്രീയത്തിൽ പ്രസക്തി നഷ്ടപ്പെട്ട ചിലരുടെ സ്ഥാപിത ലക്ഷ്യങ്ങളാണ് ഈ നീക്കത്തിന് പിന്നിലെന്നും ചില സ്ഥാപിത താല്പര്യക്കാരുടെ ഇംഗിതത്തിന് കത്തോലിക്കരെ വിട്ടുനൽകാനാവില്ലെന്നും പത്രക്കുറിപ്പിലൂടെ ജോസഫ് ജൂഡ് അറിയിച്ചു.