പുനലൂർ രൂപത എൽ.സി.വൈ.എം. അർദ്ധ വാർഷിക സെനറ്റ് സമ്മേളനം പൂർത്തിയാക്കി

ഷിബു നെറ്റോ സി.

പുനലൂർ: പുനലൂർ രൂപത എൽ.സി.വൈ.എം. ഈ വർഷത്തെ അർദ്ധ വാർഷിക സെനറ്റ് സമ്മേളനം പൂർത്തിയാക്കി. ജൂലൈ 14 ശനിയാഴ്ച  പത്തനാപുരം ആനിമേഷൻ സെൻറിൽ വച്ചായിരുന്നു ഈ വർഷത്തെ അർദ്ധ വാർഷിക സെനറ്റ് സമ്മേളനം.

രാവിലെ 8 മണിക്ക് രജിസ്ട്രേഷനോടെ  ആരംഭിച്ച സെനറ്റ് സമ്മേ ളനത്തിൽ പുനലൂർ രൂപതയിലെ 28 ഇടവകകളിൽ നിന്നായി  103 യുവജനങ്ങൾ പങ്കെടുത്തു. എൽ.സി.വൈ.എം. പുനലൂർ രൂപതാ പ്രഥമ ജനറൽ സെക്രട്ടറി ശ്രീ പോൾ ജോസ് പടമാട്ടമേൽ തിരി തെളിയിച്ച് സെനറ്റ് സമ്മേളനം ഉദ്ഘാടനം  ചെയ്തു.

2018 ജനുവരി മുതൽ 2018 ജൂൺ വരെയുളള പുനലൂർ രൂപതാ എൽ.സി.വൈ.എം. ന്റെ പ്രവർത്തനങ്ങളെ വിലയിരുത്തുവാനും ഈ പ്രവർത്തനങ്ങൾ വഴി പൂർത്തികരിച്ച ലക്ഷ്യങ്ങൾ  അറിയുവാനും വിലയിരുത്തുവാനുമാണ് ഈ സെനറ്റ് സമ്മേളനം സംഘടിപ്പിച്ചത്.

സെനറ്റ് സമ്മേളനത്തിന്റെ ആദ്യം മുതൽ അവസാനം വരെ എൽ.സി.വൈ.എം. പുനലൂർ രൂപതാ ഡയറക്ടർ റവ. ഫാ ജോസ് ഫിഫിൻ സി.എസ്.ജെ. യുടെസാന്നിധ്യം ആവേശം പകർന്നു. അതുപോലെ തന്നെ, രൂപതാ പ്രസിഡന്റ് കുമാരി ഡീനാ പീറ്റർ ജോസഫ്, രൂപത ജനറൽ സെക്രട്ടറി കുമാരി സ്റ്റെഫി ചാൾസ്, മറ്റ് രൂപത സമിതി അംഗങ്ങളായ ജിബിൻ ഗബ്രിയേൽ, അഖിൽ അനിയൻ, ഡോൺ ഡാനിയൽ ജോസഫ്, മെറിൻ ജെ. വിൻസെന്റ്, ദിലീപ്, ലിബിൻ, ഷിജോ എന്നിവരുടെ സാന്നിധ്യം സെനറ്റ് സമ്മേളനത്തിന്റെ ആധികാരികത വർധിപ്പിച്ചു.

രൂപതാ സമിതിയംഗമായ ശ്രീ. ജിബിൻ ജെ. ഫെർണാണ്ടസിന്റെ നേതൃത്വത്തിലായിരുന്നു സെനറ്റ് സമ്മേളന ക്രമീകരണങ്ങൾ നടത്തിയത്.