പുത്തൻ തലമുറയിൽ ചരിത്രബോധം വളർത്തണം; ഡോ.ജോസഫ് കളത്തിപ്പറമ്പിൽ മെത്രാപ്പോലീത്ത

ജോസ് മാർട്ടിൻ

കൊച്ചി: പുതുതലമുറയിൽ ചരിത്രബോധം വളർത്തിയെടുക്കുന്നതിന് കേരള ലാറ്റിൻ കാത്തലിക് ഹിസ്റ്ററി അസ്സോസിയേഷന് വളരെക്കാര്യങ്ങൾ ചെയ്യാൻ കഴിയുമെന്ന് വരാപ്പുഴ അതിരൂപത മെത്രാപ്പോലീത്ത മോസ്റ്റ് റവ.ഡോ.ജോസഫ് കളത്തിപ്പറമ്പിൽ. കേരള ലാറ്റിൻ കാത്തലിക് ഹിസ്റ്ററി അസ്സോസിയേഷന്റെ എക്സിക്യൂട്ടീവ് കമ്മിറ്റി യോഗം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.

ചരിത്രസംബന്ധിയായ നിരവധി പുസ്തകങ്ങൾ രചിക്കപ്പെടുന്നുണ്ടെങ്കിലും, വായിക്കാനും പഠിക്കാനുമുള്ള താല്പര്യം കുറഞ്ഞുവരുന്നതായി ചൂണ്ടിക്കാട്ടിയ അദ്ദേഹം, ചരിത്ര പുസ്തകങ്ങൾ, മറ്റു രേഖകൾ തുടങ്ങിയവ വായിക്കാനും പഠിക്കാനും ലക്ഷ്യമിട്ട് വരാപ്പുഴ അതിരൂപതയിൽ ആരംഭിക്കുന്ന ചരിത്ര ലൈബ്രറി താമസിയാതെ പ്രവർത്തനമാകുമെന്നും ആർച്ച്ബിഷപ്പ് ജോസഫ് കളത്തിപ്പറമ്പിൽ പറഞ്ഞു.

അടുത്ത ഒരു വർഷത്തേക്കുള്ള കർമ്മപദ്ധതികൾക്ക് യോഗം അംഗീകാരം നൽകി. കെ.ആർ.എൽ.സി.ബി.സി ഹെറിറ്റേജ് കമ്മീഷൻ സെക്രട്ടറി ഫാ.ഡോ.ആന്റെണി പാട്ടപ്പറമ്പിൽ, കെ.എൽ.സി.എച്ച്.എ. ഡയറക്ടർ ഫാ.റോക്കി റോബിൻ, പ്രസിഡന്റ് ഡോ.ചാൾസ് ഡയസ്, ജനറൽ സെക്രട്ടറി ഡോ.ഗ്രിഗറി പോൾ, ഖജാൻജി ജോസഫ് ആഞ്ഞിപ്പറമ്പിൽ, മുൻ സെക്രട്ടറി മാത്തച്ചൻ അറയ്ക്കൽ, ജോ.സെക്രട്ടറി ഡോ.സുരേഷ് ജെ, അസി.ട്രഷറർ അലക്സ് മുതുകുളം തുടങ്ങിയവർ സംസാരിച്ചു.