കെവിൻ ജോസഫിന്റെ കൊലപാതകം പോലീസ്‌ ഒന്നാം പ്രതി; കെ.എൽ.സി. എ.

അനിൽ ജോസഫ്‌

നെയ്യാറ്റിൻകര: കോട്ടയം നട്ടാശേരി എസ്‌.എച്ച്‌. മൗണ്ട്‌ സ്വദേശി കെവിൻ പി. ജോസഫിന്റെ കൊലപാതകത്തിൽ പോലീസ്‌ ഒന്നാം പ്രതിയെന്ന്‌ കേരളാ ലാറ്റിൻ കാത്തലിക്‌ അസോസിയേഷൻ.

ഞായറാഴ്‌ച പുലർച്ചെ കെവിന്‍ ജോസഫിനെ അക്രമി സംഘം തട്ടികൊണ്ട്‌ പോയ വിവരം കെവിന്റെ പിതാവ്‌ ജോസഫും, ഭാര്യ നീനു ചാക്കോയും പോലീസിനെ അറിയിച്ചിട്ടും പോലീസ്‌ അന്വേക്ഷിക്കാത്തതിനാലാണ്‌ കെവിന്റെ മരണം സംഭവിച്ചതെന്നും കുറ്റക്കാരായ പോലീസുകാർക്കെതിരെ മാതൃകാപരമായ നടപടി ഉണ്ടായില്ലെങ്കിൽ പ്രതിഷേധവുമായി തെരുവിലിറങ്ങേണ്ടി വരുമെന്നും കെ.എൽസി.എ. നെയ്യാറ്റിൻകര രൂപതാ സമിതി അറിയിച്ചു.

കെവിനെ തട്ടികൊണ്ട്‌ പോയി മണിക്കൂറുകൾ കഴിഞ്ഞട്ടും അക്രമികളെ സംരക്ഷിക്കുന്ന നിലപാടാണ്‌ പോലിസ്‌ സ്വീകരിച്ചത്‌. പരാതിയുമായെത്തിയ കെവിന്റെ ബന്ധുക്കളെ പോലീസ്‌ ഭീഷണിപ്പെടുത്തിയാണ്‌ മടക്കി അയച്ചത്‌ ഇതെല്ലാം കൂട്ടിവായിക്കുമ്പോൾ പോലീസ്‌ അക്രമികൾക്കൊപ്പമയിരുന്നു എന്നത്‌ വ്യക്‌തമാണെന്നും കെ.എൽ.സി.എ. നേതൃത്വം കുറ്റപ്പെടുത്തി.

കെ.എൽ.സി.എ. രൂപതാ സമിതിയുടെ നേതൃത്വത്തിൽ ലോഗോസ്‌ പാസ്റ്ററൽ സെന്റിൽ ചേർന്ന പ്രതിഷേധ യോഗമാണ്‌ പോലീസിനെതിരെ രൂക്ഷ വിമർശനം ഉന്നയിച്ചത്‌.

രൂപതാ വികരിജനറൽ മോൺ. ജി. ക്രിസ്‌തുദാസ്‌ പ്രതിഷേധ യോഗം ഉദ്‌ഘാടനം ചെയ്‌തു . കെ.എൽ.സി.എ. രൂപതാ പ്രസിഡന്റ്‌ ഡി. രാജു, സെക്രട്ടറി സദാനന്ദൻ, ട്രഷറർ വിജയകുമാർ തുടങ്ങിയവർ പ്രസംഗിച്ചു.

വിജയപുരം ലത്തീൻ രൂപതയിലെ കുന്നുപുറം ഇടവകാഗമാണ്‌ മരിച്ച കെവിൻ ജോസഫ്‌.