കുടുംബയോഗം സൂം ആപ്പിലൂടെ… ഞെട്ടിച്ച് അമലോത്ഭവമാതാ യൂണിറ്റ്

അനിൽ ജോസഫ്

നെയ്യാറ്റിന്‍കര: കുടുബയോഗം സൂം ആപ്പിലൂടെ സംഘടിപ്പിച്ച് ഞെട്ടിച്ച് നെയ്യാറ്റിന്‍കര രൂപതയിലെ അമലോത്ഭവമാതാ കത്തീഡ്രല്‍ ഇടവകക്ക് കീഴിലെ അലലോത്ഭവമാതാ കുടുംബയൂണിറ്റ്. ഒരു മാസത്തില്‍ 2 കുടുംബ യൂണിറ്റുകള്‍ (ബി.സി.സി.) സംഘടിപ്പിച്ചിരുന്ന കുടുംബ യൂണിറ്റ് കഴിഞ്ഞ രണ്ടരമാസമായി ലോക്ഡൗണ്‍ കാരണം നിലച്ച് പോയിരുന്നു. എന്നാൽ, ശാസ്ത്ര സാങ്കേതികതയെ ഉപയോഗപ്പെടുത്തി കുടുംബാഗങ്ങള്‍ തമ്മിലുളള ഊഷ്മളമായ ബന്ധം വീണ്ടും സൂം ആപ്പിലൂടെ പങ്ക് വച്ചാണ് ഇവർ കൊറോണക്കാലത്തെ വിശ്വാസ സാക്ഷ്യത്തിനായുള്ള വഴിതുറന്നിടുത്.

കത്തോലിക്കാ സഭയില്‍ തന്നെ വ്യത്യസ്തമായ ഈ അനുഭവത്തില്‍ സന്ദേശം നൽകാനും ആശംസകളര്‍പ്പിക്കാനും കെആര്‍എല്‍സിസി ലെയ്റ്റി കമ്മീഷൻ സെക്രട്ടറി ഫാ.ഷാജ്കുമാറുമെത്തിയിരുന്നു. കുടുബ യൂണിറ്റിൽ വ്യത്യസ്തമായ പരിപാടികള്‍ ധാരാളം ഒരുക്കുന്ന ലീഡര്‍ ജസ്റ്റിന്‍ ക്ലീറ്റസിന്റെ നേതൃത്വത്തില്‍ സംഘടിപ്പിച്ച കുടുംബയോഗത്തിൽ ഒട്ടുമിക്ക കുടുംബാഗങ്ങളും പങ്കെടുത്തു. അപൂര്‍വ്വങ്ങളില്‍ അപൂര്‍വ്വമായി സംഘടിപ്പിച്ച ഓണ്‍ലൈന്‍ കുടുംബ യോഗത്തിന് “കൊറോണയോടൊപ്പം കൊറോണയില്ലാത്ത ജീവിത”മെന്നായിരുന്നു പേര്. ലോക്ക് ഡൗണില്‍ ഓണ്‍ലൈന്‍ മത്സരങ്ങളും കുടുംബ യൂണിറ്റ് സംഘടിപ്പിച്ചിരുന്നു.