ശ്രീലങ്കയിൽ കൊല്ലപ്പെട്ടവർക്ക്‌ വേണ്ടി ആദരാഞ്ജലികളോടെ, കരുണകൊന്തയുമായി കേരളപുരം ഇടവക കെ.സി.വൈ.എം.

സ്വന്തം ലേഖകൻ

കൊല്ലം: കൊല്ലം രൂപതയിലെ കേരളപുരം മേരിറാണി ഇടവകയിലെ കെ.സി.വൈ.എം. അംഗങ്ങൾ ഇന്നലെ വൈകുന്നേരം (22-04-19) ശ്രീലങ്കയിൽ ഈസ്റ്റർ ദിനം കൊല്ലപ്പെട്ടവർക്ക്‌ ആദരാഞ്ജലികൾ അർപ്പിച്ചുകൊണ്ട്, കൈകളിൽ മെഴുകുതിരിയുമേന്തി പ്രാർത്ഥന നടത്തി.

ലോകസമാധാനത്തിനു വേണ്ടി പ്രാർത്ഥിക്കുകയും ബോംബ് സ്ഫോടനത്തിൽ മരിച്ചവരുടെ ആത്മശാന്തിയ്ക്കായി കരുണകൊന്ത ചൊല്ലി പ്രാർത്ഥിക്കുകയും ചെയ്തു. കെ.സി.വൈ.എം. സംസ്ഥാന വൈസ് പ്രസിഡന്റ്‌ ഡെലിൻ നേതൃത്വം നൽകിയ പ്രാർത്ഥനാസംഗമത്തിൽ ധാരാളം യുവജനങ്ങൾ പങ്കെടുത്തു.

കൊല്ലം രൂപതയിലെ മറ്റു ഇടവകകളിലും സമാനമായ രീതിയിൽ പ്രാർത്ഥനാസംഗമങ്ങൾ നടത്തുന്നതായിരിക്കുമെന്നും അങ്ങനെ അവരുടെ ദുഃഖത്തിൽ പങ്കുചേരുകയും, കൊല്ലം രൂപതയുടെ ഐക്യദാർഢ്യം പ്രഖ്യാപിക്കുകയും ചെയ്യുമെന്ന് കൊല്ലം രൂപതാ കെ.സി.വൈ.എം. ഡയറക്ടർ ഫാ.ഷാജൻ നൊറോണ പറഞ്ഞു.