തൊണ്ണൂറ്റി രണ്ടാം വയസ്സിൽ ആദ്യ സിനിമാ ഗാനം പാടി മരട് ജോസഫ്

സ്വന്തം ലേഖകൻ

കൊച്ചി: നൂറുകണക്കിന് നാടകഗാനങ്ങൾ പാടി അഭിനയിക്കുകയും റെക്കോർഡ് ചെയ്യുകയും ചെയ്ത മരട് ജോസഫ് തൊണ്ണൂറ്റി രണ്ടാം വയസ്സിൽ ആദ്യസിനിമാ ഗാനം പാടി ശ്രദ്ദേയനാകുന്നു. സഹീർ അലി സംവിധാനം ചെയ്യുന്ന ‘എ ഡ്രമാറ്റിക് ഡെത്ത്’ എന്ന സിനിമയ്ക്കു വേണ്ടിയാണ് മരട് ജോസഫ് പാടിയിരിക്കുന്നത്.

“ആരോഗ്യ വേളാങ്കണ്ണി അമ്മ” എന്നു തുടങ്ങുന്ന ഗാനമാണ് മരട് ജോസഫ് ആലപിച്ചത്. സംഗീത സംവിധായകൻ അജയ് ജോസഫ് ഒരുക്കിയ പാട്ട് വാഴക്കാല മെട്രോ സ്റ്റുഡിയോയിലാണ് റെക്കോർഡ് ചെയ്തത്.

പി.ജെ.ആന്റണി, ജോബ് മാസ്റ്റർ എന്നിവരുടെ അനേകം നാടക ഗാനങ്ങൾ പാടിയിട്ടുള്ള മരട് ജോസഫിനെ സിനിമയിൽ പാടിക്കാനുള്ള നിയോഗം ജോബ് മാസ്റ്ററുടെ മകനായ അജയ് ജോസഫിനായിരുന്നുവെന്നതും നിയോഗമാകാം.