കുടിവെള്ള ക്ഷാമത്തിനെതിരെ ആലപ്പുഴ രൂപതാ കെ.എൽ.സി.എ. യുടെ പ്രധിഷേധ സമരം

ജോസ് മാർട്ടിൻ

ആലപ്പുഴ: കുടിവെള്ള ക്ഷാമത്തിനെതിരെ ആലപ്പുഴ രൂപതാ കെ.എൽ.സി.എ. യുടെ പ്രധിഷേധ സമരം നടത്തി. കേരളാ ലാറ്റിൻ കാത്തലിക് അസോസിയേഷൻ (കെ.എൽ.സി.എ.) ആലപ്പുഴ രൂപതാ ഡയറക്ടർ ഫാ.ജോൺസൺ പുത്തൻവീട്ടിലിന്റെ നേതൃത്വത്തിലാണ് ആലപ്പുഴ വാട്ടർ അതോറിറ്റി ഓഫീസിന് മുമ്പിൽ പ്രധിഷേധ സമരം നടത്തിയത്. ആലപ്പുഴ മുനിസിപ്പാലിറ്റിയുടെ കീഴിൽഉള്ള 52 വാർഡുകളിലും, സമീപപ്രദേശങ്ങളിലെ 8 പഞ്ചായത്തുകളിലും കഴിഞ്ഞ കുറേ മാസങ്ങളായി കുടിവെള്ളം ലഭിക്കാത്ത അവസ്ഥയാണെന്നും കഴിഞ്ഞ 11 ദിവസങ്ങളായി തുർച്ചയായ പൈപ്പ് പൊട്ടൽ മൂലം കുടിവെള്ള ക്ഷാമം അതിരൂക്ഷമായിരിക്കുകയാണെന്നും രൂപതാ ഡയറക്ടർ ഫാ.ജോൺസൻ പുത്തൻവീട്ടിൽ പറഞ്ഞു.

ആലപ്പുഴ രൂപതയിലെ വിവിധ ഇടവകകളിലെ കെ.എൽ.സി.എ. പ്രവർത്തകരും, രൂപതാ സമിതിയും സംയുക്തമായാണ് പ്രതിഷേധ സമരം നടത്തിയത്. കെ.എൽ.സി.എ. രൂപതാ പ്രസിഡന്റ് ശ്രീ.ജോൺ ബ്രിട്ടോ പ്രധിഷേധ സമരം ഉദ്ഘാടനം ചെയ്തു. രൂപതാ വൈസ് പ്രസിഡന്റും, കോൾപിംഗ് ഇന്ത്യയുടെ നാഷണൽ പ്രസിഡന്റുമായ സാബു വി.തോമസ്, സംസ്ഥാന സമിതി അംഗം ശ്രീമതി.ജെസ്റ്റിനാ, കെ.സി.വൈ.എം. രൂപതാ ഡയറക്ടർ ഫാ. സെബാസ്റ്റ്യൻ പുന്നക്കൽ തുടങ്ങിയവർ സംസാരിച്ചു. മുൻകാല പ്രവർത്തകരായ ശ്രീ.ക്ളീറ്റസ് കളത്തിൽ തുടങ്ങിയവർ നേതൃത്വം നൽകി.

ഇത് ഒരു പ്രതീകാത്മക സമരം മാത്രമാണെന്നും, കുടിവെള്ള പ്രതിസന്ധി ഉടൻ പരിഹരിച്ചില്ലായെങ്കിൽ കെ.എൽ.സി.എ, കെ.സി.വൈ.എം. തുടങ്ങി ഇതര സംഘടനകളുടെ നേതൃത്വത്തിൽ ശക്തമായ സമര പരിപാടികളുമായി മുന്നോട്ട് പോകുമെന്നും ഡയറക്ടർ ഫാ.ജോൺസൻ പുത്തൻവീട്ടിൽ അറിയിച്ചു. തുടർന്ന്, കെ.എൽ.സി.എ. പ്രസിഡന്റ് ശ്രീ.ജോൺ ബ്രിട്ടോയുടെ നേതൃത്വത്തിൽ വാട്ടർ അതോറിറ്റി എക്സിക്യൂട്ടീവ് എഞ്ചിനീയർക്ക് മെമ്മോറാണ്ടം സമർപ്പിച്ചു.