ഭാരത ലത്തീന്‍സഭയിലെ ബിഷപ്പ്മാരുടെ 36-ാമത് പ്ലീനറി അസംബ്ലിക്ക് തുടക്കം
ഇന്ത്യയിലെ ലത്തീന്‍ ബിഷപ്പ്മാരുടെ 36-ാമത് പ്ലീനറി അസംബ്ലി ഒഡീഷയിലെ ഭൂവനേശ്വറില്‍ ആരംഭിച്ചു
അനില്‍ ജോസഫ്
ഭൂവനേശ്വര്‍ (ഒഡീഷ) : ഇന്ത്യയിലെ ലത്തീന്‍ ബിഷപ്പ്മാരുടെ 36-ാമത് പ്ലീനറി അസംബ്ലി ഒഡീഷയിലെ ഭൂവനേശ്വറില്‍ ആരംഭിച്ചു. കട്ടക്- ഭവനേശ്വര്‍ അതിരൂപതയിലെ എക്സിയം യൂണിവേഴ്സിറ്റിയിലാണ് അസംബ്ലി സംഘടിപ്പിച്ചിരിക്കുന്നത്. അസംബ്ലിയുടെ പ്രരംഭത്തില്‍ നടന്ന ദിവ്യബലിക്ക് ഇന്ത്യയുടെ അപ്പോസ്തലിക് ന്യൂണ്‍ഷ്യോ ആര്‍ച്ച് ബിഷപ്പ് ലിയോ പോള്‍ഡോ ജിറേലി മുഖ്യ കാര്‍മ്മികനായി.
ആര്‍ച്ച് ബിഷപ്പ് ജോണ്‍ ബാര്‍വ, കര്‍ദിനാള്‍ ഫിലിപ്നേരി ഫെയരാവോ. കര്‍ദിനാള്‍ ആന്‍റണി ബൂല, കര്‍ദിനാള്‍ ഓസ്വാള്‍ഡ് ഗ്രേഷ്യസ് ആര്‍ച്ച് ബിഷപ്പ് അനില്‍ കൂട്ടോ, ഫാ. സ്റ്റിഫന്‍ ആലത്തറ തുടങ്ങിയവര്‍ സഹകാര്‍മ്മികരായി.
വിവിധ രൂപതകളില്‍ പുതുതായി നിയമിതരായ ബിഷപ്പുമാരെ അസംബ്ലി സ്വാഗതം ചെയ്യുകയും കോണ്‍ഫറന്‍സിലെ അന്തരിച്ച അംഗങ്ങള്‍ക്ക് ആദരാജ്ഞലി അര്‍പ്പിച്ച് മൗനം ആചരിക്കുകയും ചെയ്തു.
16 കമ്മീഷനുകളിലും, നാല് അപ്പോസ്തലേറ്റുകളിലും, 14 റീജിയണല്‍ ബിഷപ്പ് കൗണ്‍സിലുകളിലും നിന്നുള്ള റിപ്പോര്‍ട്ടുകള്‍ പ്ലീനറി സമ്മേളനം അവലോകനം ചെയ്യും, എപ്പിസ്കോപ്പല്‍ കോണ്‍ഫറന്‍സിന്‍റെ പുതിയ ഭാരവാഹികളെ സമ്മേളനം തിരഞ്ഞെടുക്കും.
132 രൂപതകളെയും 209 ബിഷപ്പുമാരെയും പ്രതിനിധീകരിക്കുന്ന സിസിബിഐ, ഏഷ്യയിലെ ഏറ്റവും വലിയ ദേശീയ എപ്പിസ്കോപ്പല്‍ കോണ്‍ഫറന്‍സും ആഗോളതലത്തില്‍ നാലാമത്തെ വലിയ കോണ്‍ഫറന്‍സുമാണ്.
