സുവിശേഷ മൂല്യങ്ങൾ തന്നെയാണ് ഭരണഘടനയിൽ തെളിഞ്ഞുകാണുന്നത്; അഭിവന്ദ്യ സൂസപാക്യം മെത്രാപ്പോലീത്ത

സ്വന്തം ലേഖകൻ

തിരുവനന്തപുരം: സുവിശേഷ മൂല്യങ്ങൾ തന്നെയാണ് ഭരണഘടനയിൽ തെളിഞ്ഞുകാണുന്നതെന്നും, ആ മൂല്യങ്ങളെ ധ്വംസിക്കുന്ന എല്ലാത്തരം പ്രവണതകളെയും എതിർക്കേണ്ടത് നമ്മുടെ കടമയാണെന്നും അഭിവന്ദ്യ സൂസപാക്യം മെത്രാപ്പോലീത്ത. തിരുവനന്തപുരം ലത്തീൻ അതിരൂപതയുടെ അഭിമുഖത്തിൽ ‘ഭരണഘടനാ സംരക്ഷണദിനാചരണത്തിൽ’ സംസാരിക്കുകയായിരുന്നു ആർച്ച്ബിഷപ്പ്. പാളയം സെന്റ് ജോസഫ്‌സ് മെട്രോപൊലിറ്റന്റ് കത്തീഡ്രൽ ദേവാലയ അങ്കണത്തിൽ നടന്ന ചടങ്ങിൽ
ആർച്ച് ബിഷപ്പ് സൂസപാക്യം ദേശീയ പതാക ഉയർത്തുകയും, തുടർന്ന് റിപ്പബ്ലിക്ക് ദിന സന്ദേശം നൽകുകയും ചെയ്തു.

ഈ ഭരണഘടനാ സംരക്ഷണ ദിനാചരണത്തിലൂടെ ഭാരതജനതയുടെ മുൻപിൽ പ്രകടിപ്പിക്കുന്നത് നമ്മുടെ നിലപാടാണെന്നും, ശക്തമായ രീതിയിൽ ഭരണഘടനയെ മുറുകെ പിടിച്ചുകൊണ്ടും അതിന്റെ മൂല്യങ്ങളെ പരിപോഷിപ്പിച്ചുകൊണ്ടും എന്തു ത്യാഗവും സഹിച്ചു മുൻപോട്ട് പോകാമെന്ന് നമുക്ക് പ്രതിജ്ഞ എടുക്കാമെന്ന് അദ്ദേഹം ആഹ്വാനം ചെയ്തു. ഭരണഘടനയിൽ തെളിഞ്ഞുകാണുന്ന മൂല്യങ്ങളെ ധ്വംസിക്കുന്ന എല്ലാത്തരം പ്രവണതകളെയും എതിർക്കേണ്ടത് നമ്മുടെ കടമയാണെന്ന് മെത്രാപ്പോലീത്ത ഓർമ്മിപ്പിച്ചു. ഭരണഘടന മുറുകെ പിടിക്കുന്ന മതേത്വരത്ത ജനാധിപത്യ മൂല്യങ്ങൾക്ക് എതിരായിട്ടുള്ള ഒരു സമീപനമമാണ് പൗരത്വ ഭേദഗതി ബില്ലിലൂടെ ഇന്നത്തെ സർക്കാർ സ്വീകരിച്ചിരിക്കുന്നതെന്ന് അദ്ദേഹം പറഞ്ഞു.

തുടർന്ന് മോണസിഞ്ഞോർ ഫാ.ഡോ. നിക്കൊളാസ് ടി ഭരണഘടനയുടെ ആമുഖം വായിക്കുകയും, ആർച്ചുബിഷപ്പ് ചൊല്ലി കൊടുത്ത ഭരണഘടനാ സംരക്ഷണ പ്രതിജ്ഞ വിശ്വാസികൾ ഏറ്റുചൊലുകയും ചെയ്തു. അനേകം വിശ്വാസികൾ ‘ഭരണഘടനാ സംരക്ഷണദിനാചരണത്തിൽ പങ്കെടുത്തു.