മുന്നോക്ക വിഭാഗത്തിലെ പിന്നോക്കക്കാർക്ക് അനുവദിച്ചു നൽകിയ സംവരണ നടപടി സർക്കാർ പുന:പരിശോധിക്കണം; കെ.സി.വൈ.എം. കോട്ടപ്പുറം രൂപത

ജോസ് മാർട്ടിൻ

കോട്ടപ്പുറം: മുന്നോക്ക വിഭാഗത്തിലെ പിന്നോക്കക്കാർക്ക് സംവരണം മുഴുവനായി അനുവദിച്ചു നൽകിയ നടപടി സർക്കാർ പുന:പരിശോധിക്കണമെന്ന് കെ.സി.വൈ.എം. കോട്ടപ്പുറം രൂപത. സംവരണം അനുവദിക്കുമ്പോൾ മുന്നോക്ക വിഭാഗങ്ങളിലെ യഥാർത്ഥ അർഹരെ കണ്ടെത്തി നൽകുന്നതിൽ യാതൊരു എതിർപ്പുകളും ഞങ്ങൾക്കില്ല, എന്നാൽ കേന്ദ്ര സർക്കാർ നടപ്പിലാക്കിയ 10% സംവരണം കൃത്യമായ പഠനങ്ങളോ ചർച്ചകളോ നടത്താതെ, ആവേശത്തിലും വളരെ വേഗത്തിലും അനീതിയിൽ പൊതിഞ്ഞ് കേരളത്തിൽ നടപ്പിലാക്കാൻ പോകുന്ന നടപടികളെയാണ് എതിർക്കുന്നതെന്ന് കോട്ടപ്പുറം രൂപതാ സെൻട്രൽ ഓഫീസിൽ കൂടിയ യോഗത്തിൽ കെ.സി.വൈ.എം. രൂപത സമിതി പറഞ്ഞു.

സംവരണം മുഴുവനായി മുന്നോക്ക വിഭാഗത്തിലെ പിന്നോക്കക്കാർക്ക് അനുവദിച്ചു നൽകിയ സർക്കാർ നടപടി പുന:പരിശോധിക്കണമെന്ന് കെ.സി.വൈ.എം.കോട്ടപ്പുറം രൂപത ആവശ്യപ്പെട്ടു. പിന്നോക്ക വിഭാഗത്തിലെ ജനങ്ങളെ സമൂഹത്തിന്റെ മുഖ്യധാരയിലേക്ക് കൊണ്ടുവരിക എന്നതാണ് സംവരണം എന്നതിന്റെ ആത്യന്തികമായ ലക്ഷ്യം എന്നിരിക്കെ, അത് നടപ്പിലാകും മുൻപേ സമൂഹത്തിൽ കൂടുതൽ കൂടുതൽ മുന്നോക്കക്കാരെ മുന്നോട്ട് കൊണ്ടുവരുന്ന സർക്കാർ നടപടി പിന്നോക്ക വിഭാഗങ്ങളോട് കാണിക്കുന്ന കടുത്ത അനീതിയാണെന്നും അതു കൊണ്ട് തന്നെ സംവരണ തത്ത്വത്തിൽ സർക്കാർ ഒരു പുന:പരിശോധനയ്ക്ക് തയ്യാറാവണമെന്നുമാണ് ആവശ്യം.

കെ.സി.വൈ.എം. പ്രസിഡന്റ് അനീഷ് റാഫേൽ അദ്ധ്യക്ഷത വഹിച്ച യോഗത്തിൽ ഡയറക്ടർ ഫാ.ഡെന്നീസ് അവിട്ടംപ്പിള്ളി ആമുഖ പ്രഭാക്ഷണം നടത്തി. കെ.സി.വൈ.എം. ലാറ്റിൻ സംസ്ഥാന പ്രസിഡന്റ് അജിത്ത് കെ.തങ്കച്ചൻ മുഖ്യാതിഥിയായിരുന്നു. യോഗത്തിൽ അസി.ഡയക്ടർ സി.ഡയാന, പോൾ ജോസ്, സനൽ സാബു, റെയ്ച്ചൽ ക്ലീറ്റസ്, ശരത്ത് ശ്യാം, ഷാൽവിഷാജി, ജെൻസൻ, ആമോസ് എന്നിവർ സംസാരിച്ചു.