തെക്കിന്‍റെ കൊച്ചു പാദുവയില്‍ 19 ന് കൊടിയേറും

അനിൽ ജോസഫ്

നെയ്യാറ്റിന്‍കര: ‘തെക്കിന്‍റെ കൊച്ചു പാദുവ’ എന്നറിയപ്പെടുന്ന നെയ്യാറ്റിന്‍കര ലത്തീന്‍ രൂപതയിലെ തീര്‍ത്ഥാടന കേന്ദ്രമായ കമുകിൻകോട് വിശുദ്ധ അന്തോണീസ് ദേവാലയ തീര്‍ത്ഥാടനത്തിന്‍റെ ഒരുക്കങ്ങള്‍ പൂര്‍ത്തിയായി. 19 ന് തീര്‍ത്ഥാടനത്തിന് തുടക്കം കുറിക്കും.

19 ന് രാവിലെ കൊച്ചുപളളിയില്‍ നടക്കുന്ന വിശുദ്ധ അന്തോണീസിന്‍റെ തിരുസ്വരൂപത്തിലെ കിരീടം ചാര്‍ത്തല്‍ ശുശ്രൂഷക്ക് തിരുവനന്തപുരം ലത്തീന്‍ അതിരൂപത വികാരി ജനറല്‍ മോണ്‍. യൂജിന്‍ എച്ച്. പെരേര മുഖ്യ കാര്‍മ്മികത്വം വഹിക്കും.

അന്ന് വൈകിട്ട് നടക്കുന്ന തീര്‍ത്ഥാടന സൗഹൃദ സന്ധ്യ സഹകരണ ദേവസ്വം വകുപ്പ് മന്ത്രി കടകം പളളി സുരേന്ദ്രന്‍ ഉദ്ഘാടനം ചെയ്യും. കെ.ആന്‍സലന്‍ എം.എല്‍.എ. അധ്യക്ഷത വഹിക്കുന്ന പരിപാടിയില്‍ മലങ്കര കത്തോലിക്കാ സഭാ പരമാധ്യക്ഷന്‍ കര്‍ദിനാള്‍ മാര്‍ ബസേലിയോസ് ക്ലിമിസ് കാതോലിക്കാ ബാവ അനുഗ്രഹ പ്രഭാഷണം നടത്തും. റിച്ചാര്‍ഡ് ഹെ എം.പി. മുഖ്യ സന്ദേശം നല്‍കും. ശിവഗിരിമഠം ജനറല്‍ സെക്രട്ടറി സ്വാമി സാന്ദ്രാനന്ദ, ബാലരാമപുരം വലിയ പളളി ഇമാം അല്‍ഹാജ് പാച്ചല്ലൂര്‍ അബ്ദുള്‍ സലിം മൗലവി തുടങ്ങിയവര്‍ സംസാരിക്കും. രാത്രി 10 മണിക്ക് ഇടവക വികാരി ഫാ.ജോയിമത്യാസിന്‍റെ മുഖ്യ കാര്‍മ്മികത്വത്തില്‍ ആഘോഷമായ തീര്‍ഥാടന കൊടിയേറ്റ്.

തിരുനാള്‍ ദിനങ്ങളില്‍ പാറശാല മലങ്കര കത്തോലിക്കാ രൂപത മെത്രാന്‍ ഡോ.തോമസ് മാര്‍ യൗസേബിയോസ്, പത്തനംതിട്ട മലങ്കര കത്തോലിക്കാ രൂപതാ മെത്രാന്‍ ഡോ.സാമുവല്‍ മാര്‍ ഐറേനിയോസ്, തിരുവനന്തപുരം ലത്തീൻ അതിരൂപത സഹായ മെത്രാന്‍ ഡോ.ആര്‍. ക്രിസ്തുദാസ് തുടങ്ങിയവര്‍ തിരുകര്‍മ്മങ്ങള്‍ക്ക് നേതൃത്വം നല്‍കും.

മാര്‍ച്ച് 1 -ന് ദിവ്യബലിക്ക് ശേഷം ദിവ്യകാരുണ്യ പ്രദക്ഷിണവും, 2 -ന് ആഘോഷമായ ചപ്രപ്രദക്ഷിണവും.

തീര്‍ത്ഥാടന സമാപന ദിനമായ മാര്‍ച്ച് 3 -ന് രാവിലെ 9.30 -ന് നെയ്യാറ്റിന്‍കര രൂപതാ ബിഷപ് ഡോ.വിന്‍സെന്‍റ് സാമുവലിന്‍റെ മുഖ്യകാര്‍മ്മികത്വത്തില്‍ ആഘോഷമായ പൊന്തിഫിക്കല്‍ ദിവ്യബലി.