210 മല്‍സ്യതൊഴിലാളികള്‍ തിരിച്ചെത്താനുണ്ട്:ലത്തീന്‍ സഭ..

92 പേർ മാത്രമാണ് തിരികെയെത്താനുള്ളതെന്നാണ് ഇന്നലെ രാത്രിയിലെ സർക്കാർ കണക്ക്.

തിരുവനന്തപുരം : കടലിൽ നിന്ന് തിരികെയെത്താനുള്ളവരെക്കുറിച്ചുള്ള സർക്കാർ കണക്ക് കൃത്യമല്ലെന്ന ആരോപണവുമായി ലത്തീൻ സഭ. തിരുവനന്തപുരം ജില്ലയിൽ നിന്ന് മാത്രം 201 തൊഴിലാളികൾ തിരികെയെത്താനുണ്ടെന്ന് സഭാ നേതൃത്വം വ്യക്തമാക്കി. മുന്നറിയിപ്പ് നൽകുന്നതിലും കൃത്യസമയത്ത് രക്ഷാപ്രവർത്തനം തുടങ്ങുന്നതിലുമുണ്ടായ വീഴ്ച ദുരന്ത വ്യാപ്തി കൂട്ടിയെന്നും സഭ ആരോപിച്ചു.

92 പേർ മാത്രമാണ് തിരികെയെത്താനുള്ളതെന്നാണ് ഇന്നലെ രാത്രിയിലെ സർക്കാർ കണക്ക്. എന്നാൽ തിരുവനന്തപുരം ജില്ലയിൽ നിന്ന് മാത്രം ഇതിന്റെ ഇരട്ടിയിലേറെ പേരെ കണ്ടെത്താനുണ്ടെന്ന് വീടുകളിൽ നിന്ന് ശേഖരിച്ച കണക്ക് നിരത്തി ലത്തീൻ സഭാ നേതൃത്വം വിശദീകരിക്കുന്നത്. ചെറുബോട്ടുകളിലും വള്ളങ്ങളിലും പോയ 108 പേരെ കണ്ടെത്തിയിട്ടില്ല. വലിയ ബോട്ടുകളിൽ പോയവരേക്കൂടിയാകുമ്പോൾ തിരികെയെത്താനുള്ളവരുടെയെണ്ണം 201 ആകും.

സഭയും തൊഴിലാളികളും പലതവണ ആവശ്യപ്പെട്ടിട്ടും കൃത്യമായ രക്ഷാപ്രവർത്തനം തുടങ്ങുന്നതിൽ വൈകിയെന്നും ആരോപണമുണ്ട്. ദേശീയദുരന്തമായി പ്രഖ്യാപിക്കുന്നതിനൊപ്പം പ്രധാനമന്ത്രി നേരിട്ടെത്തണമെന്നും ആവശ്യപ്പെടുന്നു. ഭരണനേതൃത്വത്തിലുള്ളവർ ദുരന്തബാധിതരുടെ ആശങ്കയകറ്റുന്നതിൽ പരാജയപ്പെട്ടെന്നും വിമർശിച്ചു