മതത്തിന്റെപേരിൽ മനുഷ്യനെ കൊല്ലുന്ന ഈ ലോകത്ത് വിരലുകൾ നഷ്ടപ്പെട്ട് ദുരിതത്തിലായ അതിഥിയ്ക്ക് രക്ഷകരായി കെ.സി.വൈ.എം. പ്രവർത്തകർ

സ്വന്തം ലേഖകൻ

പിലാത്തറ: മതത്തിന്റെപേരിൽ മനുഷ്യനെ കൊല്ലുന്ന ഈ ലോകത്ത് വിരലുകൾ നഷ്ടപ്പെട്ട് ദുരിതത്തിലായ പ്രാവിന് രക്ഷകരായി കെ.സി.വൈ.എം. പ്രവർത്തകർ. പിലാത്തറ ടൗണിൽ ചൊവ്വാഴ്ച രാവിലെയാണ് നടക്കുവാൻ കഴിയാതെ വളരെ പ്രയാസപ്പെട്ട് ഇരിക്കുന്ന പ്രാവ് കെ.സി.വൈ.എം. കണ്ണൂർ രൂപത പ്രസിഡന്റായ മാട്ടൂൽ സ്വദേശി ഡെൽഫിൻ നിക്കിയുടെയും, പി.ആർ.ഒ.യായ പിലാത്തറ സ്വദേശി ഷാജി ലോറൻസിന്റെയും ശ്രദ്ധയിൽപ്പെട്ടത്. അടുത്തെത്തി നോക്കിയപ്പോഴാണ് കാലിൽ പ്ലാസ്റ്റിക് കയർ കുരുങ്ങി ഇരിക്കുന്നത് കണ്ടത്. കുരുക്ക് മുറുകി രണ്ട് വിരലുകൾ അറ്റുപോയ അവസ്ഥയിലായിരുന്നു ആ മിണ്ടാപ്രാണി. മനുഷ്യർ അശ്രദ്ധയോടെ വലിച്ചെറിയുന്ന പ്ലാസ്റ്റിക്കിന്റെ ഇര.

മനുഷ്യ നിർമ്മിതമായ കെണിയിൽ പെട്ടതോ, അല്ലെങ്കിൽ അലസമായി വലിച്ചെറിയപ്പെട്ട പ്ലാസ്റ്റിക് മാലിന്യത്തിൽ നിന്നോ അഴിച്ചെടുക്കാൻ പറ്റാത്തവിധം കുരുക്കിൽപ്പെട്ടതോ ആണെന്ന് വ്യക്തം. ആരുടെയെങ്കിലും സഹായം പ്രതീക്ഷിച്ചിരുന്ന പോലെ വളരെ ശാന്തയായി, അനുസരണയോടെ ഇരുന്ന പ്രാവിനെ രണ്ടുപേരും ചേർന്ന് വളരെ ശ്രദ്ധയോടെ കുരുക്കിൽ നിന്നും സ്വതന്ത്രമാക്കി. മനുഷ്യർ വലിച്ചെറിയുന്ന പ്ലാസ്റ്റിക്ക് പക്ഷി ജീവജാലങ്ങളെ എന്തുമാത്രം ദ്രോഹമാണ് ചെയ്യുന്നതിന്റെ ഒരു ഉദാഹരണമാണ് കാലിൽ നൈലോൺ ചരട് കുടുങ്ങി വിരലുകൾ അറ്റുപോയ ഈ സുന്ദരി പ്രാവ്, ഡെൽഫിൻ പറഞ്ഞു.

നമ്മുടെ ഒരു നിമിഷത്തെ അശ്രദ്ധ മറ്റു ജീവജാലങ്ങളെ ബാധിക്കുന്നത് എങ്ങനെയെന്നു നാം മനസിലാക്കുന്നില്ലയെന്നും, പ്ലാസ്റ്റിക് മാലിന്യങ്ങൾ നേരായ വിധത്തിൽ നിർമാർജനം ചെയ്തില്ലെങ്കിൽ വരും കാലങ്ങളിൽ മറ്റു ജീവികളെപ്പോലെ മനുഷ്യരെയും അത് സാരമായി ബാധിക്കുമെന്നും ഇവർ പറഞ്ഞു. വരും നാളുകളിൽ തങ്ങളാൽ കഴിയുന്ന രീതിയിലൊക്കെ, തങ്ങളുടെ പ്രവർത്തന മേഖലകളിലൂടെ പ്ലാസ്റ്റിക്കിനെതിരായി പോരാടാൻ തീരുമാനിച്ചിരിക്കുകയാണ് കെ.സി.വൈ.എം. കണ്ണൂർ രൂപത പ്രസിഡന്റായ മാട്ടൂൽ സ്വദേശി ഡെൽഫിൻ നിക്കിയും, പി.ആർ.ഒ.യായ പിലാത്തറ സ്വദേശി ഷാജി ലോറൻസും.

മുത്തൂറ്റ് മൈക്രോ ഫിൻകോർപ്പിന്റെ ഏരിയ മാനേജറാണ് ഡെൽഫിൻ, പിലാത്തറയിൽ പ്രിന്റിംഗ് ഷോപ്പ് നടത്തുകയാണ് ഷാജി.