ബിഷപ്പ് വീട് പണിയുകയാണ്; ഈ ബിഷപ്പിന് ഫ്രാൻസിസ് പാപ്പായുടെ മുഖമോ!

ബ്രദർ എഫ്രേം കുന്നപ്പള്ളി

ആദിലാബാദ്: തെലുങ്കാനയിലെ ആദിലാബാദ് രൂപതയുടെ ഇടയനായ മാർ പ്രിൻസ് ആന്റെണി പാണേങ്ങാടൻ പിതാവ് വീട് പണിയുകയാണ്. ആദിലാബാദ് രൂപതയിലെ മംചേരിയാലിലെ ബിമാരം ഗ്രാമത്തിലെ ഒരു പാവപ്പെട്ട കുടുംബത്തിന്റെ ഭവനം 2 ദിവസം മുമ്പ് ഇലക്ട്രിക് ഷോർട്ട് സെർക്യൂട്ട് ഉണ്ടായതിനെത്തുടർന്ന് കത്തി നശിക്കുകയുണ്ടായി. ഇതറിഞ്ഞ മാത്രയിൽ എങ്ങനെ ആ കുടുംബത്തെ പുനരധിവസിപ്പിക്കാം എന്ന ആലോചനയിൽ നിന്നാണ്, ഈ കൊറോണാക്കാലത്ത്, അതികഠിനമായ ചൂട് വകവയ്ക്കാതെ, നമുക്ക് തന്നെ ഭവനം കെട്ടിഉയർത്താൻ മുന്നിട്ടിറങ്ങാമെന്ന് തീരുമാനിച്ചത്.

തുടർന്ന്, പൂർണ്ണമായി കത്തി നശിച്ച ഭവനത്തിന് ‘കരുണയുടെ സ്നേഹ സ്പർശമായി’ ബിഷപ്പ് പ്രിൻസും, വൈദികരും, മംചേരിയി ഇടവകയിലെ യുവജനങ്ങളും ചേർന്ന് ഇന്ന് (May 22) പുതിയ ഭവന നിർമ്മാണം ആരംഭിക്കുകയായിരുന്നു. അഭിവന്ദ്യ പിതാവിനെടൊപ്പം രൂപതയിലെ വൈദീകരായ ഫാ.ഷിറ്റോ, ഫാ.യോഹാൻ, ഫാ.ജീജോ, ബ്രദർ ലിനോ തുടണ്ടിയവരുമുണ്ട്. ഭവന നിർമ്മാണത്തിന് ബിഷപ്പിന്റെ സാന്നിധ്യം തെല്ലൊന്നുമല്ല യുവജനങ്ങൾക്കും വിശ്വാസികൾക്കും പ്രചോദനമായിരിക്കുന്നത്.