കേരള കത്തോലിക്കാ സഭ എന്നും വികസനത്തിനൊപ്പം; കെ.സി.ബി.സി.

ജോസ് മാർട്ടിൻ

കൊച്ചി: തുറമുഖങ്ങള്‍ ഉള്‍പ്പടെ വികസന പ്രവര്‍ത്തനങ്ങള്‍ക്ക് സഭ ഒരിക്കലും എതിരല്ലെന്നും, വിഴിഞ്ഞം തുറമുഖത്തിന് നേരത്തെയും സഭ എതിരായിരുന്നില്ലെന്നും തുറമുഖം വരുമ്പോൾ അവിടെ വസിക്കുന്ന ജനങ്ങള്‍ക്കുണ്ടാകുന്ന ബുദ്ധിമുട്ടുകളാണ് സഭാസംവിധാനങ്ങള്‍ ചൂണ്ടിക്കാട്ടിയിട്ടുള്ളതെന്നും കേരള കാത്തലിക്ക് ബിഷപ്‌സ് കോൺഫറൻസ് (കെ.സി.ബി.സി.). കേരളത്തിലെ എല്ലാ കത്തോലിക്കാ രൂപതകളും തീരവാസികൾ നേരിടുന്ന ബുദ്ധിമുട്ടുകളെ ചൂണ്ടിക്കാട്ടി അവരുടെ ആവശ്യങ്ങളോടു ചേര്‍ന്നു നിന്നുവെന്നും കെ.സി.ബി.സി. ചൂണ്ടിക്കാട്ടി.

ഇപ്പോൾ ചർച്ചകളിലൂടെ സമവായത്തിലേക്കെത്തുന്നതിനായി കഴിഞ്ഞ സാഹചര്യത്തിൽ തീരുമാനങ്ങള്‍ ഫലപ്രദമായി നടപ്പാക്കാന്‍ നടപടികള്‍ ഉണ്ടാവുകയും തീരവാസികളുടെ പുനരധിവാസം സംബന്ധിച്ച് അതിനുള്ള മോണിട്ടറിംഗ് കമ്മിറ്റി അടക്കമുള്ള കാര്യങ്ങളില്‍ സമയബന്ധിതമായ സര്‍ക്കാര്‍ ഇടപെടല്‍ ഉണ്ടാവണമെന്നും കെ.സി.ബി.സി. ആവശ്യപ്പെടുന്നു.

പ്രത്യാശയിലും സന്തോഷത്തിലും കൂട്ടായ ആലോചനയിലും സഭയുടെ അടിസ്ഥാന കാഴ്ചപ്പാടിലും ശുശ്രൂഷ നിര്‍വഹിക്കാനുള്ള നിയോഗമാണ് കേരള കത്തോലിക്കാ മെത്രാന്‍സമിതിയുടെ അധ്യക്ഷനായി തെരഞ്ഞെടുക്കപ്പെട്ട തനിക്കും സഹശുശ്രൂഷകര്‍ക്കുമുള്ളതെന്ന് സീറോ മലങ്കര സഭ മേജര്‍ ആര്‍ച്ച്ബിഷപ്പ് കര്‍ദിനാള്‍ മാര്‍ ബസേലിയോസ് ക്ലീമിസ് കാതോലിക്കാ ബാവ പറഞ്ഞു. സങ്കീര്‍ണമായ കാലഘട്ടത്തില്‍ കൂട്ടായ ആലോചനകളിലൂടെയും പ്രവര്‍ത്തനങ്ങളിലൂടെയും വിവിധ വിഷയങ്ങളിലുള്ള സഭയുടെ കാഴ്ചപ്പാടുകള്‍ പ്രതിഫലിപ്പിക്കാനാകുമെന്നാണു പ്രതീക്ഷയെന്നും അദ്ദേഹം പ്രത്യാശ പ്രകടിപ്പിച്ചു.