കുരിശുമല മൗണ്ട് കാർമൽ ഇക്കോ പിൽഗ്രിം സെന്ററിലേക്ക് ‘അമ്മയോടൊപ്പം’ പ്രാർത്ഥനാ പദയാത്ര

സ്വന്തം ലേഖകൻ

വെള്ളറട: ലോകമെമ്പാടും ക്രിസ്ത്യൻ സഭയോടും ക്രൈസ്തവരോടും വർദ്ധിച്ചു വരുന്ന ആക്രമണത്തിൽ പ്രതിഷേധം അറിയിച്ചു കൊണ്ടും ലോകസമാധാനം പുന:സ്ഥാപിക്കണമേ എന്ന പ്രാർത്ഥനയോടെയും KCYM (L) ഉണ്ടൻകോട് ഫൊറോന സമിതിയുടെ ആഭിമുഖ്യത്തിൽ കുരിശുമല മൗണ്ട് കാർമൽ ഇക്കോ പിൽഗ്രിം സെന്ററിലേക്ക് ‘അമ്മയോടൊപ്പം’ പ്രാർത്ഥനാ പദയാത്ര സംഘടിപ്പിച്ചു. 07/11/2020 ശനിയാഴ്ച രാവിലെ 8 മണിക്ക് ആരംഭിച്ച പ്രാർത്ഥനാ പദയാത്രയ്ക്ക് ശേഷം മലമുകളിൽ ഫാ.അലക്സ് സൈമണിന്റെ കാർമികത്വത്തിൽ ദിവ്യബലിയർപ്പണവും നടത്തി.

ലോകമെമ്പാടും ക്രൈസ്തവർക്കും ക്രൈസ്തവ ആരാധനാലയങ്ങൾക്കും നേരെ അന്ധകാര ശക്തികൾ നടത്തുന്ന ആക്രമണം പോലെ കുരിശുമല മൗണ്ട് കാർമൽ ഇക്കോ ടൂറിസം സെന്ററിലെ പൗരാവകാശത്തെ ധ്വംസിക്കുന്ന തരത്തിലെ ചില നിഗൂഡശക്തികൾ നടത്തുന്ന നീക്കത്തിനെതിരെ ഫെറോന പ്രസിഡന്റ് ശ്രീ.ആനന്ദിന്റെ നേതൃത്വത്തിൽ മലമുകളിൽ യുവജനങ്ങൾ മുദ്രാവാക്യം ഉയർത്തി പ്രതിഷേധം അറിയിക്കുകയും ചെയ്തു.

ഫൊറോനയിലെ വിവിധ ഇടവകകളിൽ നിന്നും മുപ്പതോളം യുവജനങ്ങൾ പങ്കെടുത്ത പ്രാർത്ഥനാ പദയാത്രയും പ്രതിക്ഷേധ പ്രകടനവും കോവിഡ് പ്രോട്ടോക്കോൾ കർശനമായി പാലിച്ചുകൊണ്ടാണ് സംഘടിപ്പിച്ചതെന്ന് ഫെറോനാ സമിതി പറഞ്ഞു.