റവ.ഡോ.സേവ്യർരാജ് പൗരോഹിത്യ രജതജൂബിലി നിറവിൽ

സ്വന്തം ലേഖകൻ

ജർമ്മനി: നെയ്യാറ്റിൻകര രൂപതയിലെ ഫാ.സേവ്യർരാജ് പൗരോഹിത്യ രജതജൂബിലി നിറവിൽ. സ്ട്യുഡ്ഗാഡ് രൂപതയിലെ റാറ്റ്ഹൗസൺ ഇടവകയിൽ വെച്ച് ഒക്ടോബർ ഏഴിനായിരുന്നു ദിവ്യബലിയോടൊപ്പം രജത ജൂബിലി ആഘോഷങ്ങൾ. നെയ്യാറ്റിൻകര രൂപതാ വികാരി ജനറൽ മോൺ.ജി.ക്രിസ്തുദാസ് വചനം പങ്കുവെക്കുകയും ആശംസകൾ അർപ്പിക്കുകയും ചെയ്തു.

ദൈവവിളിയും പൗരോഹിത്യവും മഹനീയമായ ദാനങ്ങളാണെന്നും; നമ്മുടെ വൈദീകജീവിതം മറ്റുള്ളവരെ സേവിക്കുവാനായും, പാവപ്പെട്ടവർക്കും ബലഹീനർക്കും അത്താണിയായി മറുവാനുമുള്ള മഹോന്നതമായ വിളിയാണെന്നും ദിവ്യബലി മദ്ധ്യേ മോൺ.ജി.ക്രിസ്തുദാസ് ഉദ്‌ബോധിപ്പിച്ചു.

രൂപതയിലെ മൈനർ സെമിനാരിയിൽ ഏറെകാലം റെക്ടറായി സേവനമനുഷ്‌ടിച്ചിരുന്ന ഫാ.സേവ്യർരാജിന്റെ സെമിനാരി രൂപീകരണത്തിലൂടെ കടന്നുപോയവരാണ് ഇന്ന് ജെർമ്മനിയിൽ സേവനം ചെയ്യുന്ന നെയ്യാറ്റിൻകര രൂപതയിലെ ഭൂരിഭാഗം വൈദീകരും. അവർ തങ്ങളുടെ രൂപീകരണ കാലഘട്ടത്തിൽ അച്ചനിലൂടെ ലഭ്യമായ നന്മകൾ ഓർക്കുകയും, അച്ചൻ തങ്ങളുടെ രൂപീകരണത്തിൽ ചെലുത്തിയ സ്വാധീനത്തെയും പ്രചോദനത്തെയും അനുസ്മരിക്കുകയും ചെയ്തു.

നെയ്യാറ്റിൻകര രൂപതയിൽ നിന്ന് ജർമനിയിലെ മ്യുൺസ്റ്റർ, സ്ട്യുഡ്ഗാഡ്, പസ്സാവു എന്നീ രൂപതകളിൽ സേവനം ചെയ്യുന്ന വൈദീകരാണ് രജത ജൂബിലി ആശംസകൾ നേരുവാൻ ഒത്തു കൂടിയത്. ഫാ.അജി റോസ്, ഫാ.വിൻസെന്റ് സാബു, ഫാ.സന്തോഷ്, ഫാ.പ്രദീപ് ജോസഫ്, ഫാ.ഷിബു, ഫാ.ആനന്ദ് എന്നിവർ സഹകാർമികരായി. ജപമാല രാജ്ഞിയുടെ തിരുനാൾ ദിനമായ ഒക്ടോബർ ഏഴിനായിരുന്നു ഫാ.സേവ്യർരാജിന്റെ ജന്മദിനവും.