കറുത്ത ചരിത്രം

കാഴ്ചയും ഉള്‍ക്കാഴ്ചയും

ഫാ. ജോസഫ് പാറാങ്കുഴി

മാന്യമിത്രമേ…
ദൈവത്തിനു നമ്മെക്കുറിച്ച് ഒരു യജമാന പദ്ധതിയുണ്ട്.
നമ്മുടെ നാശത്തിനല്ല, മറിച്ച് ക്ഷേമത്തിനുളളതാണ്.

ശാസ്ത്ര സാങ്കേതിക വൈജ്ഞാനിക മണ്ഡലങ്ങളില്‍-
ആധുനിക ലോകം ദിനംപ്രതി മുന്നേറുകയാണ്.
പ്രപഞ്ചത്തെയും പ്രാപഞ്ചിക രഹസ്യങ്ങളെയും-
കൈപ്പിടിയിലൊതുക്കുവാനുളള ശ്രമത്തിലാണു മനുഷ്യന്‍.

ആധുനിക മനുഷ്യന്‍ ആര്‍ജ്ജനാസക്തിയുടെ അടിമയാണ്.
യുദ്ധവും യുദ്ധ ഭീഷണിയും കൊല്ലും കൊലവിളിയും-
കൊട്ടേഷന്‍ സംഘങ്ങളും മാഫിയാ സംഘങ്ങളും
ഒളിഞ്ഞും തെളിഞ്ഞും അരങ്ങു തകര്‍ക്കുകയാണ്.
ജാതിയും മതവും രാഷ്ട്രീയവും അധികാരവും പണവും കെട്ടുപിണഞ്ഞ്
രാഷ്ട്രീയ പകപോക്കലും രക്തസാക്ഷിമണ്ഡപങ്ങളും-
നാടുനീളെ ശവപ്പറമ്പുകള്‍ തീര്‍ക്കുകയാണ്…

ആവിഷ്കാരസ്വാതന്ത്ര്യത്തിന്‍റെ മറവില്‍
ധാര്‍മ്മിക മൂല്യങ്ങളെ ചവിട്ടിമെതിക്കുന്ന-
സനാതന മൂല്യങ്ങളെ തമസ്കരിക്കുന്ന
കുടുംബ ബന്ധങ്ങളെ തകിടംമറിക്കുന്ന-
സീരിയലുകളും സിനിമകളും റിയാലിറ്റിഷോകളും-
അധമസംസ്കാരം രൂപപ്പെടുത്താന്‍ തത്രപ്പെടുന്ന മാധ്യമ സംസ്കാരം!

ദൈവമേഖലയില്‍ വ്യാപരിക്കേണ്ടവനായ മനുഷ്യന്‍-
ജഡികാസക്തിയ്ക്ക് വശംവദനായി മൃഗമായി മാറുന്ന ദുരവസ്ഥ
ദൈവത്തിന്‍റെ ശവപ്പെട്ടിയ്ക്ക് അവസാനത്തെ ആണിയും-
അടിച്ചുകയറ്റി എന്ന് അഹങ്കരിക്കുന്ന ചാനല്‍ ചര്‍ച്ചകള്‍…

സ്വാസ്ഥ്യം അന്യമായിക്കൊണ്ടിരിക്കുന്ന പുത്തന്‍ തലമുറ.
മദ്യവും മയക്കുമരുന്നും നീലചിത്രങ്ങളും മസ്തിഷ്കത്തില്‍
വിഷം നിറച്ച് മനുഷ്യ മാഹാത്മ്യത്തെ ഹനിക്കുന്ന ദുര്‍ഗതി.
ദിശാബോധം നഷ്ടപ്പെട്ട് നീലതിമിംഗലത്തിന്‍റെ-
കരാള ഹസ്തങ്ങളിലേക്ക് വീണുടയുന്ന തലമുറ…

മൗലീക അവകാശങ്ങളെയും മൗലീക സത്യങ്ങളെയും-
കോടികളുടെ ബലത്തില്‍ കോടതികളില്‍ നിന്നു നേടുന്ന
അന്യായ വിധി തീര്‍പ്പുകളുടെ ഘോഷയാത്ര…
മനുഷ്യന്‍ കറുത്ത ചരിത്രം രചിക്കുന്നു.
ദൈവം പരിതപിക്കുന്നു!!!