രാജ്യത്ത് മതേതരത്വവും സഹവർത്തിത്വവും പ്രോത്സാഹിപ്പിക്കാന്‍ ഭാരതസഭയോട് അഹ്വാനം ചെയ്ത് കര്‍ദിനാള്‍ ഓസ്വാള്‍ഡ് ഗ്രേഷ്യയസ്
രാജ്യത്ത് മതേതരത്വവും സഹവർത്തിത്വവും പ്രോത്സാഹിപ്പിക്കാന്‍ ഭാരതസഭയോട് അഹ്വാനം ചെയ്ത് കര്‍ദിനാള്‍ ഓസ്വാള്‍ഡ് ഗ്രേഷ്യയസ്
സ്വന്തം ലേഖകൻ
ഗോവ: രാജ്യത്ത് മതേതരത്വവും സഹവർത്തിത്വവും ഐക്യവും പ്രോത്സാഹിപ്പിക്കാന്‍ ഭാരതസഭയോട് അഹ്വാനവുമായി കര്‍ദിനാള്‍ ഓസ്വാള്‍ഡ് ഗ്രേഷ്യയസ്. ഗോവയിലെ വിപുലീകരിച്ച കത്തോലിക്കാ ബിഷപ്പുമാരുടെ (സിസിബിഐ) സെക്രട്ടേറിയറ്റ് ഉദ്ഘാടനം ചെയ്ത് സംസാരിക്കുകയായിരുന്നു കര്‍ദിനാള്‍.
‘പൗരത്വ ഭേദഗതി നിയമം രാജ്യത്തെ എല്ലാ പൗരന്മാര്‍ക്കും വലിയ ഉത്കണ്ഠയുണ്ടാക്കുന്നു, മതപരമായ രീതിയില്‍ നമ്മുടെ ജനങ്ങളെ ധ്രുവീകരിക്കാന്‍ സാധ്യതയുണ്ട്, ഇത് രാജ്യത്തിന് വളരെ ദോഷകരമാണ്. നമ്മുടെ രാജ്യത്ത് എല്ലാവരോടും ഐക്യദാര്‍ഠ്യവും ആദരവും വളര്‍ത്തേണ്ടത് എല്ലാവരുടെയും ഉത്തരവാദിത്തമാണെന്നും അദ്ദേഹം പറഞ്ഞു. നമ്മുടെ രാജ്യത്തിന് സമാധാനവും ഐക്യവും നിലനില്‍ക്കാനായി എല്ലാ ക്രൈസ്തവരും നിരന്തരം പ്രാര്‍ത്ഥിക്കണമെന്നും അദ്ദേഹം അഭ്യര്‍ത്ഥിച്ചു.
ശാന്തി സദന്‍ എന്നപേരിൽ ആശീര്‍വദിച്ച സെക്രട്ടറിയേറ്റ് ഇൻഡ്യൻ സഭയുടെ പ്രവർത്തനങ്ങൾ കൂടുതൽ ത്വരിതപ്പെടുത്തുക എന്ന ലക്ഷ്യത്തോടെയാണു സ്ഥാപിച്ചിരിക്കുന്നത്‌. 12 ബിഷപ്പുമാരും അനേകം വൈദീകരും സന്യസ്തരും ചടങ്ങിൽ പങ്കെടുത്തു.
പുതിയ സെക്രട്ടറിയേറ്റിലേക്കെത്താന്‍ ഗോവ വിമാനത്താവളത്തില്‍ നിന്ന് 17 കിലോമീറ്ററും, സിറ്റി റെയില്‍വേ സ്റ്റേഷനില്‍ നിന്ന് 4 കിലോമീറ്ററുമാണ് ദൂരം. നിലവില്‍ സിസിബിഐക്ക് ഇന്ത്യയില്‍ അഞ്ച് സെക്രട്ടേറിയറ്റ് കെട്ടിടങ്ങളുണ്ട്.
പരിപാടികളില്‍ ഗോവ ആര്‍ച്ച് ബിഷപ് ഡോ.ഫിലിപ്പി നേറി ഫെരേരോ, മദ്രാസ് മൈലാപ്പര്‍ ആര്‍ച്ച് ബിഷപ് ഡോ.ജോര്‍ജ്ജ് അന്‍റോണി സ്വാമി, ഡല്‍ഹി ആര്‍ച്ച് ബിഷപ് ഡോ.അനില്‍ കൊട്ടോ, സിബിസിഐ ഡെപ്യൂട്ടി സെക്രട്ടറി ഡോ.സ്റ്റീഫന്‍ ആലത്തറ തുടങ്ങിയവര്‍ പങ്കെടുത്തു.
