ഫാ. സേവ്യർ തേലക്കാട്ടിന്‍റെ സംസ്കാരം ശനിയാഴ്ച; മലയാറ്റൂരിൽ പൊതുദർശനം

കൊച്ചി: ഫാ. സേവ്യർ തേലക്കാട്ടിന്‍റെ സംസ്കാര ശുശ്രുഷകൾ ശനിയാഴ്ച രാവിലെ പത്തിനു പെരുമ്പാവൂർ ഈസ്റ്റ് ചേരാനല്ലൂർ സെന്‍റ് ഫ്രാൻസിസ് സേവ്യർ പള്ളിയിൽ നടക്കും.

പോസ്റ്റ്മോർട്ടം നടപടികൾ കളമശേരി മെഡിക്കൽ കോളജിൽ പൂർത്തിയാക്കി. അങ്കമാലി ലിറ്റിൽ ഫ്ലവർ ആശുപത്രിയിൽ സൂക്ഷിക്കുന്ന മൃതദേഹം വെള്ളിയാഴ്ച രാവിലെ 10 മുതൽ രാത്രി എട്ടുവരെ മലയാറ്റൂർ സെന്‍റ് തോമസ് പള്ളിയിൽ പൊതുദർശനത്തിനു വയ്ക്കും. തുടർന്ന് ഈസ്റ്റ് ചേരാനല്ലൂരിലുള്ള വസതിയിലേക്കു കൊണ്ടുപോകും.

ശനിയാഴ്ച രാവിലെ പത്തിനു സംസ്കാര ശുശ്രൂഷകൾ ആരംഭിക്കും. മേജർ ആർച്ച്ബിഷപ് കർദിനാൾ മാർ ജോർജ് ആലഞ്ചേരിയുടെ മുഖ്യകാർമികത്വത്തിലാണു സംസ്കാര ശുശ്രൂഷകൾ നടക്കുക.