ദൈവദാസന്‍ ഫാ.അദെയോദാത്തൂസ് ഓര്‍മ്മത്തിരുനാള്‍ ആഘോഷങ്ങള്‍ക്ക് സമാപനം
ദൈവദാസന്‍ ഫാ.അദെയോദാത്തൂസ് ഓര്‍മ്മത്തിരുനാള്‍ ആഘോഷങ്ങള്‍ക്ക് സമാപനം
അനിൽ ജോസഫ്
തിരുവനന്തപുരം: മുതിയാവിള വലിയച്ചന്‍ എന്നറിയപ്പെടുന്ന ദൈവദാസന്‍ ഫാ.അദെയോദാത്തൂസിന്റെ ഓര്‍മ്മ തിരുനാള്‍ ആഘോഷങ്ങള്‍ക്ക് സമാപനമായി. ആഘോഷങ്ങളുടെ സമാപനത്തിന്റെ ഭാഗമായി നടന്ന പൊന്തിഫിക്കല്‍ ദിവ്യബലിക്ക് നെയ്യാറ്റിന്‍കര ബിഷപ് ഡോ.വിന്‍സെന്‍റ് സാമുവല്‍ മുഖ്യ കാര്‍മ്മികത്വം വഹിച്ചു. വിശുദ്ധമായ ജീവിതത്തിന്റെ ഉടമയാണ് ദൈവദാസന്‍ ഫാ.അദെയോദാത്തൂസെന്ന് ബിഷപ് പറഞ്ഞു.
വഴുതക്കാട് കാര്‍മ്മല്‍ഹില്‍ ആശ്രമം വൈസ് പ്രോസ്റ്റുലേറ്റര്‍ ഫാ.കുര്യന്‍ ആലുങ്കല്‍ വചന സന്ദേശം നല്‍കി. തിരുവനന്തപുരം അതിരൂപത വികാരി ജനറല്‍ മോണ്‍. സി.ജോസഫ്, പേയാട് സെന്‍റ് സേവ്യര്‍ സെമിനാരി റെക്ടര്‍ ഡോ.ക്രിസ്തുദാസ് തോംസണ്‍, കാര്‍മ്മല്‍ ഹില്‍ ആശ്രമം പ്രിയേര്‍ ഫാ.അഗസ്റ്റിന്‍ പുന്നോലില്‍, കാട്ടാക്കട ഫൊറോന വികാരി ഫാ.വല്‍സലന്‍ ജോസ് തുടങ്ങിയവര്‍ സഹ കാര്‍മ്മികരായി.
കഴിഞ്ഞ ഞായറാഴ്ച കാര്‍മ്മല്‍ഹില്‍ ആശ്രമ ദേവാലയത്തിനുളളിലെ ഫാ.അദെയോ ദാത്തൂസിന്റെ ശവകുടീരത്തില്‍ നിന്ന് ആരംഭിച്ച വിശ്വാസദീപ പ്രയാണം നെയ്യാറ്റിന്‍കര രൂപതയിലെ വിവിധ ഫൊറോനകളിലും ഫാ.അദെയോ ദൂസിന്റെ കര്‍മ്മമണ്ഡലമായിരുന്ന കാട്ടാക്കട താലൂക്കിലെ വിവിധ പ്രദേശങ്ങളിലും പ്രയാണം നടത്തി തിരികെ വഴുതക്കാട് കാര്‍മ്മല്‍ഹില്‍ ആശ്രമ ദേവാലയത്തിലേക്ക് എത്തി, തുടര്‍ന്നാണ് തിരുകര്‍മ്മങ്ങള്‍ക്ക് തുടക്കമായത്.
