ക്രിസ്ത്യാനിയുടെ മുഖമുദ്ര അഹങ്കാരവും അധികാരവുമല്ല

മത്തായി 20 : 20-28

“നിങ്ങളില്‍ വലിയവനാകാന്‍ ആഗ്രഹിക്കുന്നവന്‍ നിങ്ങളുടെ ശുശ്രൂഷകനും നിങ്ങളില്‍ ഒന്നാമനാകാന്‍ ആഗ്രഹിക്കുന്നവന്‍ നിങ്ങളുടെ ദാസനുമായിരിക്കണം”.

ക്രിസ്തു നമ്മെ ഓർമിപ്പിക്കുന്നത് ‘ഒരു മികച്ച ക്രിസ്തു അനുയായിയായി ജീവിക്കുവാനാണ്’. യേശു പറയുന്നത് ശ്രദ്ധിക്കുക : “വിജാതീയരുടെ ഭരണകര്‍ത്താക്കള്‍ അവരുടെ മേൽ യജമാനത്വം പുലര്‍ത്തുന്നുവെന്നും, അവരുടെ പ്രമാണികള്‍ അവരുടെമേല്‍ അധികാരം പ്രയോഗിക്കുന്നുവെന്നും നിങ്ങള്‍ക്കറിയാമല്ലോ.
എന്നാല്‍, നിങ്ങളുടെയിടയില്‍ അങ്ങനെയാകരുത്‌” – ഇതിനർത്ഥം മറ്റൊന്നുമല്ല – നീ ഒരു ക്രിസ്ത്യാനി ആണോ എങ്കിൽ നീ വ്യത്യസ്തനായിരിക്കണം.

ക്രിസ്ത്യാനിയുടെ മുഖമുദ്ര അഹങ്കാരവും അധികാരവുമല്ല, മറിച്ച് എളിമയും സേവനവുമാണ്. നമ്മുടെ ജീവിതം പലപ്പോഴും തിരയുന്നത് നമ്മുടെ തന്നെ ഔന്നത്യവും സുരക്ഷിതത്വവും സന്തോഷവും ആണല്ലോ. എന്നാൽ യേശു പറയുന്നു, നീ അതെല്ലാം ത്യജിക്കണം, കാരണം നീ എന്റെ അനുയായിയാണ്. അതുകൊണ്ടാണ്, യേശു പറയുന്നത് : ‘താൻ വന്നിരിക്കുന്നത് ശുശ്രൂഷിക്കപ്പെടാനല്ല, ശുശ്രൂഷിക്കാനും അനേകരുടെ മോചനദ്രവ്യമായി സ്വജീവന്‍ കൊടുക്കുവാനുമാണെന്ന്’. നമ്മിൽ, സ്വയം നൽകലിന്റെ, വിട്ടുകൊടുക്കലിന്റെ മനോഭാവം ഉണ്ടാകണം എന്ന് സാരം.

നിങ്ങളില്‍ വലിയവനാകാന്‍ ആഗ്രഹിക്കുന്നവന്‍ നിങ്ങളുടെ ശുശ്രൂഷകനും നിങ്ങളില്‍ ഒന്നാമനാകാന്‍ ആഗ്രഹിക്കുന്നവന്‍ നിങ്ങളുടെ ദാസനുമായിരിക്കണം.