സ്വന്തം ലേഖകൻ
കെനിയ: ഒരു കെനിയ പുരോഹിതൻ കവർച്ചയിൽ കൊല്ലപ്പെട്ടുവെന്ന് ഫീഡസ് ന്യൂസ് ഏജൻസി റിപ്പോർട്ട് ചെയ്യുന്നു. ഫാ. ജോൺ നൊജോഗെഹ് മുഹിയ, ക്യാംബു എന്ന സ്ഥലത്തെ കീനോ ദേവാലയത്തിലെ വികാരിയായിരുന്നു. ക്യാംബുവിൽ നിന്ന് 25 കിലോമീറ്റർ അകലെയുള്ള നെയ്റോബിയിലെ ഒരു ബാങ്കിലേക്കുള്ള യാത്രാമധ്യേയായിരുന്നു ആക്രമണം.
നാലു മോട്ടോർ ബൈക്കുകളിലായി എത്തിയ സംഘം ഫാ. ജോൺ സഞ്ചരിച്ചിരുന്ന കാർ തടഞ്ഞുനിറുത്തുകയും കാറിൽ ഉണ്ടായിരുന്ന ബാഗ് കൈമാറാൻ ആവശ്യപ്പെടുകയും ചെയ്തു. എന്നാൽ അത് വിസമ്മതിച്ച വൈദികനെ സംഘത്തിലെ ഒരുവൻ തോക്കെടുത്ത് വെടിവയ്ക്കുകയായിരുന്നു. ഫാ. ജോണിന്റെ പുറകിലും നെഞ്ചിലും വെടിയുണ്ടകളേറ്റു.
തുടർന്ന്, ഫാ. ജോണിന്റെ ബാഗും മൊബൈൽ ഫോണും കൈക്കലാക്കിയ സംഘം മോട്ടോർ ബൈക്കുകളിൽ രക്ഷപ്പെടുകയായിരുന്നു. വെടിയൊച്ച കേട്ടുവെന്നും തുടർന്ന് ബൈക്കുകൾ ഓടിപ്പോകുന്നതിന്റെ ശബ്ദം കേട്ടുവെന്നും അടുത്ത കെട്ടിടത്തിലെ ഒരു ദൃക്സാക്ഷി പറഞ്ഞതായി പോലീസ് റിപ്പോർട്ട് ചെയ്യുന്നു. ശബ്ദം കേട്ട് ഓടിവന്നവർ ഫാ. ജോണിനെ ഹോസ്പിറ്റലിലേക്ക് കൊണ്ടുപോകും വഴിതന്നെ മരണം സംഭവിച്ചു.
1994 ഡിസംബർ 30-ന് വൈദീകനായി അഭിഷിക്തനായി ഫാ. ജോണിന് 56 വയസായിരുന്നു. അദ്ദേഹം കെനിയയിലെ സെന്റ് പീറ്റർ റോക്ക് ദേവാലയത്തിലും സേവനം അനുഷ്‌ടിച്ചിട്ടുണ്ട്.
